Börnin fríð og góð.

Fríða Katrín er ekki byrjuð að labba, hún kann það en hún er ekki á því að sýna það endilega. Það er þrjóska í telpunni. Hvaðan hún fær hana, vitum við ekki...ehhhmm.

Það þarf ekki mikið til að gleðja þessa ungu mær, ef hún er súr á svipinn má alltaf pota henni í stólinn sinn og færa henni eitthvað að maula. Þarna er hún með flatköku með kæfu og lárperubita...ummmmm.

Brostið hefur á með fyrirsætustælum hjá Fríðu. Stútur á munni, hallandi mjaðmir og brosað með augunum.

Þessi dáðadrengur kann líka sitthvað fyrir sér þegar myndavél er sveiflað í nálægð. Þarna má hinsvegar sjá litla tilgerð, aðeins stóíska ró.

Fríða er orðin eldklár, líkt og hún á kyn til og er hún þarna að svara til hvar hinir og þessir líkamshlutir eru. Þarna var hún spurð hvar "nebbinn" væri. Hvert er hún að benda...?

Börnin hittu jólasveina á sunnudaginn. Kertasníkir og Giljagaur tóku forskot á sæluna og kíktu til byggða. Stefán var voða upprifinn af því að hitta þá. Hann fékk líka fullan poka af ýmsu dóti og gotteríi. Engar kartöflur.

Fríða Katrín fékk líka fullan poka. Hún var spennt yfir mandarínunni og myndum af fisknum Nemo.

Jólaballið var haldið fyrir starfsfólk Pennans, á skrifstofunni í Glæsibæ. Eftir að hafa dansað, sungið, þegið pakkana frá jólasveinum og borðað kökur og kræsingar tók ég eina mynd. Allir saddir og sælir eftir góðan dag.

Klipp og kitl

Það er við hæfi að fara í klippingu áður en Vetur konungur kemur til byggða. Þannig er öll fjölskyldan búin að fara í klippingu á síðustu dögum; mamman fór á stofu í vesturbænum, pabbinn á Akureyri, Fríða heima og Stefán á Háteigsveginum.

Það var hrekkjavaka á dögunum og við Fríða deildum eðlubúningi. Við vorum mjög hræðileg saman.

Fríða Katrín getur verið mjög stríðin og lætur hún ekki gott kitlfæri úr hendi sleppa.

Það var kominn tími á klippingu hjá Stefáni Bjarti. Hann sá vart lengur út úr lubbanum og kennararnir voru farnir að kvarta yfir að sjá illa framan í hann. Þessi mynd er tekin þegar hann var á leiðinni út í klippingu.

Megum við kynna "Nýja Stefán Bjart". Þessi mynd er tekin um leið og hann kom heim. Þetta er aldeilis nýr Stefán. Heitir ekki allt "nýi" þetta og "nýi" hitt í dag?!

Fríða litla var smástund að átta sig á nýja Stefáni en um leið og það kom, fór hún strax að kitla hann.

Haustið er komið og börnin glöð og hress!

Haustið er komið og börnin mætt í skólann. Stefán er voða ánægður í Hlíðaskóla og honum gengur voða vel. Á þessari mynd getur hann vart hamið hláturinn eftir að ég bað hann að vera alvarlegan á mynd. Takið eftir húðflúrinu!

Stefán er duglegur að læra og ekki er það ónýtt að hafa móður sína sem kennara. Stefán er byrjaður að lesa og er þarna að skreyta lestrarbókina sína.

Þau eru mjög miklir fjörkálfar og finnst voða gaman að leika sér í hjónarúminu.

Þarna er hún Fríða aðeins að róast í rúminu og brosir sínu blíðasta. Það er ekki laust við að hún líkist henni Kaju frænku sinni. Ekki leiðum að líkjast.

Fríða er byrjuð á leikskólanum Sólhlíð, þar sem Stefán var. Henni gekk rosalega vel í aðlöguninni, það var ekkert mál að skilja hana eftir hjá krökkunum. Þarna er hún hinsvegar heima hjá sér að skutla honum Bangsímon úr stofunni yfir í herbergi.

Sumarfríið á Ísafirði

Á síðasta degi Stefáns á leikskólanum Sólhlíð, mætti hann með tvær hljómsveitir með sér. Benni Hemm Hemm og Reykjavík! komu og spiluðu fyrir krakkana. Skólastjórinn komst svo að orði að flestir krakkar kæmu með köku eða ís á síðasta deginum en Stefán þurfti að gera þetta öðruvísi.

Eftir að Stefán hætti á skólanum lá leiðin strax vestur í paradísina. Þarna eru krakkarnir hjá afa Stebba að fagna nýustu frænkunni, henni Soffíu Rún. Hún var skírð í endaðan júlí.

Við fórum í frábæra heimsókn í Dufansdal til Árnýjar, Súna, Jóns Darra og Brynhildar Lailu. Þarna eru Fríða og Brynhildur í náttúruparadísinni við Hvestu, grunlausar um alla umræðu um olíuhreinsunarstöð.

Að sjálfsögðu fórum við á Valseyri og fengum að gista eina nótt. Þarna er hún amma Didda og Fríða að ræða málin.

Í endaðan ágúst byrjaði svo Stefán í Hlíðaskóla, þarna er hann á leiðinni í skólann fyrsta daginn.

Stefán getur stundum verið voða hugsi við matarborðið. Þá finnst honum rétti tíminn að ræða málin og slíkt, í stað þess að borða matinn sinn. Það er svo sem skiljanlegt á þessum tímum, allir á fleygiferð. En hann mætti taka systur sína til fyrirmyndar í matarást sinni.

Stefán á hjóli

Stefán fór út að hjóla með ömmu Steinu og það gekk svona vel að hann er alveg búin að ná þessu.

Næsta verkefni hjá henni er svo að kenna Fríðu að labba.

Á sjó

Strax morguninn eftir að við komum vestur dreif Jón Þór okkur út á sjó.

Það voru veiðistangir um borð og við Stefán fengum þennan stærðar þorsk sem varð að plokkfisk í Kjarrholtinu um kvöldið.





Veiðimaðurinn verður að gera að aflanum sjálfur.

Stefáni leist ekkert á aðfarir móður sinnar þegar hún gerði að fiskinum.

En hann gleymdi þessu öllu þegar hann fékk að stýra heim.

Sumarið er tíminn!

Fríða Katrín tók mikið stökk í kjölfar afmælis síns og hóf að taka enn hressilegar á matnum sínum, fór að taka fleiri tennur og að stíga meira í lappirnar. Hún er eiginlega orðinn hinn mesti mathákur, hún nær m.a.s. að tæma af disknum áður en maður nær að smella af!

Stefán Bjartur ákvað að kenna litlu systur sinni hvernig maður kubbar og hann bjó til Hallgrímskirkju. Væntanlega mynda þá kubbarnir sem eru hjá honum á teppinu Listasafn Einars Jónssonar við Freyjugötu. Hann er lunkinn strákurinn!

Stefán fékk hjól í byrjun sumars. Hjólið er rosa gæjalegt og stórt. Hann rétt nær niður og er að enn að æfa sig, það tekur tíma og dassa af þolinmæði. Hann veit ekki alveg hvað það er.

Þarna er hún Fríða sumarleg í vagninum, nýkomin af sumarhátíð Sólhlíðar (leikskóla Stefáns).

Þetta er hreinlega póstkort! Þarna er Stefán á þjóðhátíðardaginn að skoða forsetabílinn, gamla Packardinn sem kostaði meira en allir demantar Dorritar. Hann er glæsilegur. Stefán heimtaði að við keyptum svona bíl, enda hundleiður á þessum Golf station bíl sem fjölskyldan hefur látið sér duga síðustu ár. Þetta er spurning um "Bryndís á Bessastaði" eftir 4 ár?!